Ільінскі кірмаш

Ільінскі кірмаш родам з Саматэвічаў і яму амаль двесці год. З даўніх часоў у населеных пунктах Саматэвічы і Бялынкавічы ладзілісь штогод кірмашы на Іллю, на якіх прадавалі і куплялі неабходныя прадметы для хатняй гаспадаркі і жывёліну.

На Ільінскі кірмаш збіраліся з Рослаўлю, з Бранску і нават з Кіеву таргашы: куплялі, таргавалі, забаўляліся! Для рамеснікаў была добрая магчымасць прадаць свае вырабы: бочкі, карзіны, маслабойкі, дзежкі, крышкі, гаршкі, чугуны з гліны.

Гусінае свята

У народным календары 31 студзеня ёсць свята — Апанас, Гусінае свята. Свята свойскай жывёлы. «Гусінае свята» стала своеасаблівым брэндам Касцюковіцкага раёна. Адрадзілі яго мясцовыя жыхары аграгарадка Белая Дуброва і работнікі культуры. Яго гісторыя выйшла ўжо далёка за межы рэгіёна, дапамагае захаваць творчую самабытнасць і арыгінальнасць. А гусі з Белай Дубровы, нібы сапраўдныя артысты, здзіўлялі публіку ў розных гарадах нашай краіны.